ᐱᓕᕆᐊᕆᓲᕗᑦ
ᑲᑭᕙᒃᑯᑦ ᐊᑐᐃᓐᓇᐅᕗᑦ ᐋᕿᒃᓱᐃᖃᑎᖃᕐᓗᑎᒃ ᓇᖕᒥᓂᖅᑖᕋᓱᐊᕐᑐᓂᒃ, ᐃᖅᑲᓇᐃᔮᕐᑖᕋᓱᐊᕐᓂᕐᒥᒃ ᐊᒻᒪ ᐃᓕᓂᐊᕐᓂᕐᒥᒃ ᐱᓕᕆᐊᒃᓴᓂᒃ ᕿᑭᖅᑕᓂ ᓄᓇᓕᓕᒫᓂᑦ. ᑕᒪᓐᓇ ᐱᓕᕆᓲᕆᕙᕗᑦ ᒪᓂᓴᐃᓪᓗᑕ ᐊᒥᓱᓂᒃ ᐊᔾᔨᒌᖏᕈᓘᔭᕐᑐᓂᒃ ᐱᓕᕆᐊᒃᓴᓂᒃ ᐸᕐᓇᒍᑕᐅᔪᓂᒃ:
- ᐱᓕᒻᒪᒃᓴᐃᕙᒃᑐᑦ ᐃᓄᖕᓂᒃ ᐱᒋᐊᕈᑎᒃᓴᓄᑦ, ᐊᐅᓚᑦᑎᓂᕐᒥᓄᑦ ᐊᒻᒪ ᐱᕈᖅᐸᓪᓕᐊᑎᑦᑎᓂᕐᒥᑦ ᓇᖕᒥᓂᕆᔭᐅᔪᒥᑦ
- ᐃᑲᔪᖅᐸᒃᑐᑦ ᐸᐃᕆᕝᕕᖕᓂᑦ ᑮᓇᐅᔭᖃᖅᑎᑦᑎᓂᒃᑯᑦ ᖃᓄᕐᓗ ᐃᑲᔪᕈᑎᒃᓴᑎᒍᑦ
- ᐃᑲᔪᖅᑐᐃᕙᒃᑐᑦ ᒪᒃᑯᒃᑐᓄᑦ ᐊᒻᒪ ᐊᔪᕈᑎᖃᕐᑐᓂᓪᓗ ᑮᓇᐅᔾᔭᒃᓵᓄᑦ ᐃᑲᔫᑎᑎᒍᑦ ᐃᖅᑲᓇᐃᔮᒃᓴᓕᐅᕐᓂᒃᑯᓪᓗ
- ᐃᑲᔪᖅᑐᐃᕙᒃᑐᑦ ᐳᓚᕋᕐᑐᓕᕆᓂᕐᒧᑦ ᑐᕌᖓᔪᓂᒃ ᐃᖅᑲᓇᐃᔮᖅᑖᕋᓱᖕᓂᕐᒥᒃ ᐊᒻᒪ ᐃᓕᓐᓂᐊᕐᓂᕐᒥᒃ ᓄᓇᓕᖕᓂᑦ ᖃᓂᒃᓴᖅᑐᓂᒃ ᑲᓇᑕᒥᑦ ᒥᕐᖑᐃᖅᓯᕐᕕᓂᒃ ᕿᑭᖅᑖᓗᖕᒥᑦ
ᓴᖅᑭᑕᐅᓯᒪᔪᑦ ᐊᕕᒃᑐᖅᓯᒪᕗᑦ ᐅᑯᓄᖓ ᐱᓕᕆᕝᕕᓄᑦ:
- ᓇᖕᒥᓂᖃᕐᓂᕐᒧᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᕝᕕᒃ
- ᐸᐃᕆᕝᕕᖕᓄᑦ, ᒪᒃᑯᒃᑐᓄᑦ ᐊᒻᒪ ᐊᔪᕈᑎᖃᕐᑐᓄᓪᓗ ᐱᓕᕆᕝᕕᒃ
- ᐱᓕᒻᒪᒃᓴᕐᓂᕐᒧᑦ ᐊᒻᒪ ᐃᖅᑲᓇᐃᔭᕐᓂᕐᓗ ᐱᓕᕆᕝᕕᒃ
ᐃᓕᑕᕆᔭᐅᔪᓐᓇᕋᔭᖅᑰᕐᐲᑦ ᑮᓇᐅᔭᓂᒃ ᑐᒃᓯᕋᒐᒃᓴᓃᑦ?
ᐱᓕᕆᕝᕕᓄᑦ ᑮᓇᐅᔭᐃᑦ ᑐᒃᓯᕋᖅᑕᐅᔪᓐᓇᕐᐳᑦ ᐃᓄᑐᐊᕐᓄᑦ, ᑲᑐᔾᔨᖃᑎᒌᖕᓄᑦ, ᑭᒃᑯᑐᐃᓐᓇᕐᓄᑦ ᐅᕝᕙᓘᓐᓃᑦ ᐃᓕᓐᓂᐊᕐᓂᕐᒧᑦ ᐃᓕᓴᖅᕕᐅᔪᓄᑦ, ᕼᒻᓚᐅᔪᓄᑦ, ᑮᓇᐅᔾᔭᒃᓴᕈᑕᐅᓐᖏᑦᑐᓄᑦ ᑲᑐᔾᔨᖃᑎᒌᖏᓐᓄ, ᓇᖕᒥᓂᖃᕐᑐᓄᑦ ᐃᖅᑲᓇᐃᔭᕐᕕᒋᔭᖅ ᐊᒻᒪ ᑯᐊᐸᒃᑯᓄᑦ. ᕿᒥᕈᐊᕐᓗᒋᑦ ᐱᓕᕆᐊᒃᓴᓄᑦ ᒪᓕᒋᐊᓖᑦ ᓇᓗᓇᐃᖅᑕᐅᓯᒪᔪᓂᒃ ᐃᓕᑕᕆᔭᐅᔪᓐᓇᕈᑎᓂᒃ.
ᖃᖓ ᐃᓱᓕᕝᕕᖃᖅᐸ?
ᑐᒃᓯᕋᐅᑏᑦ ᑎᑭᑦᑐᐃᑦ ᕿᒥᕈᐊᖅᑕᐅᓲᑦ ᖃᖓᑐᐃᓐᓇᓕᒫᖅ ᐊᕐᕌᒍᓕᒫᖅ, ᑮᓇᐅᔭᑦ ᐊᑐᕋᔭᓐᖑᐊᖅᑐᑦ ᓄᖑᓚᐅᓐᖏᓐᓂᓕᒫᖏᓐᓂᑦ ᐊᕐᕌᒍᒧᑦ. ᑲᑭᕙᒃᑯᑦ ᖃᐅᔨᑎᑦᑎᓇᓱᓲᖑᕗᑦ ᑐᒃᓯᕋᕐᓯᒪᔪᓂᒃ 45-ᓂᒃ ᐅᓪᓗᓂᑦ ᑐᒃᓯᕋᐅᒻᒥᑦ ᐱᓚᐅᕐᑎᓪᓗᒋᑦ.
ᐱᓕᕆᐊᑦᑎᓐᓂᒃ ᑐᓂᓯᓂᖅ
ᑲᑭᕙᒃᑯᑦ ᖃᐅᔨᒪᕗᑦ ᐃᓛᓐᓂᒃᑯᑦ ᐊᔪᕐᓇᖃᑦᑕᕐᒪᑦ ᐱᓕᕆᐊᒃᓴᓂᒃ ᐱᓇᓱᒋᐊᒃᓴᖅ ᓄᓇᓕᖕᓂᑦ. ᐃᑲᔪᕈᒪᕗᒍᑦ ᐃᓕᖕᓄᑦ ᐊᑲᐅᓛᖑᓇᔭᕐᑐᒥᑦ. ᐱᓕᕆᐊᑦᑎᓐᓂᒃ ᑐᓂᓯᓲᖑᕗᒍᑦ ᐅᑰᓇᑎᒍᑦ:
- ᐊᑭᖃᖏᑦᑐᒃᑯᑦ ᐅᖃᓗᒃᕕᐅᔪᓐᓇᕐᑐᖅ ᑐᕌᖅᑎᑦᑎᔪᓐᓇᖅᐳᖅ ᖃᐅᔨᒪᑦᑎᐊᕐᑐᒥᒃ ᐱᓕᕆᔨᐅᔪᒥᒃ ᖃᓄᐃᖁᔭᒥᓂᒃ ᐅᖃᐅᔾᔨᒋᐊᕈᓐᓇᖅᑐᒥᒃ, ᐃᑲᔪᕐᓗᓂ ᐊᒻᒪ ᐊᑐᕆᐊᓕᖕᓂᑦ ᒪᓕᒃᑎᑦᑎᐊᕐᓗᓂᑎᑦ ᐱᓕᕆᐊᕆᕙᒃᑕᑦᑎᓐᓂᒃ. ᐅᖄᓚᓗᑎᑦ 1-800-561-0911-ᒧᑦ ᖃᖓᑐᐃᓐᓇᖅ ᐃᖅᑲᓇᐃᔭᕐᓇᐅᑎᓪᓗᒍ.
- ᑐᑭᓯᒋᐊᕐᑕᕐᕕᒃ ᖃᕋᓴᐅᔭᒃᑯᑦ: ᓄᑖᖅ ᑖᓐᓇ ᑐᑭᓯᒋᐊᖅᕕᒃ ᖃᕋᓴᐅᔭᒃᑯᑦ ᐃᓗᓕᖃᕐᐳᖅ ᑐᓴᒐᒃᓴᓂᒃ ᐱᓕᕆᐊᕆᖃᑦᑕᕐᑕᑦᑎᓐᓂᒃ ᐊᒻᒪ ᓄᑖᓂᒃ ᑐᑭᓯᒋᐊᕐᑕᕐᕕᒃ ᖃᕋᓴᐅᔭᒃᑯᑦ ᐊᑐᕐᑐᒃᓴᓄᑦ ᐱᔪᓐᓇᖁᓪᓗᑎᑦ ᖃᕋᓴᐅᔭᒃᑯᑦ ᑐᒃᓯᕋᐅᑎᓂᒃ ᑕᑎᑎᕆᐊᓕᖕᓂᑦ ᐊᒻᒪ ᓇᓗᓇᖏᑦᑐᓂᒃ ᕿᓂᖅᓴᕈᑎᓂᒃ ᐱᔪᒪᔭᕐᓂᑦ.
- ᖃᕋᓴᐅᔭᒃᑯᑦ ᑎᑎᕋᕐᖕᓂᖅ: ᐊᐱᖅᑯᑎᒃᓴᔅᓯᓐᓂᒃ ᓇᒃᓯᐅᔾᔨᔪᓐᓇᕆᕗᓯ ᖃᕋᓴᐅᔭᒃᑯᑦ ᑎᑎᕋᕐᖕᓂᒃᑯᑦ ᖃᕋᓴᐅᔭᐅᑉ ᑐᑭᓯᒋᐊᖅᑕᕐᕕᖓᓃᑎᓪᓗᑎᑦ.
- ᓱᒃᑲᔪᒃᑯᑦ: ᖃᐅᔨᒪᕗᒍᑦ ᖃᕋᓴᐅᔭᖅ ᐱᐅᖏᓐᓇᐅᔭᖏᒻᒪᑕ. ᓇᒃᓯᐅᑎᓯᐅᒃ ᐊᐱᖅᑯᑎᓯ, ᐱᔪᒪᔭᓯ ᐅᕝᕙᓘᓐᓃᑦ ᑐᒃᓯᕋᐅᑎᔅᓯᓐᓂᒃ ᑕᑎᑎᕐᓯᒪᔪᓂᒃ ᐅᕗᖓ ᓱᒃᑲᔪᒃᑯᑦ 867-979-3707-ᒧᑦ.
- ᓇᖕᒥᓂᖅ ᐅᐸᒃᓗᑎᑦ: ᐅᐸᒃᕕᒃᓴᓕᐅᕐᓗᑎᑦ ᑲᑎᒪᖃᑎᖃᕆᐊᕐᓗᑎᑦ ᐱᓕᕆᔨᑦᑎᓐᓂᑦ ᐃᖃᓗᖕᓂᑦ. ᕿᑭᖅᑕᓂᒃ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᐅᒪᑎᑦᑎᔨᖏᑦ ᓄᓇᓕᖕᓂᑦ ᐊᑐᐃᓐᓇᐅᒋᕗᑦ ᐃᑲᔪᕈᓐᓇᕐᖢᑎᒃ ᓄᓇᓕᖕᓂᕐᒥᐅᑕᓂᒃ, ᓇᖕᒥᓂᖃᕐᑐᓂᒃ, ᑲᑐᔾᔨᖃᑎᒌᖕᓂᑦ ᐊᒻᒪ ᒐᕙᒪᒃᑯᓐᓂᑦ ᑕᐅᑐᒃᓗᓯᐅᒃ ᑲᑭᕙᒃᑯᑦ ᐱᓕᕆᐊᖏᓐᓂᒃ ᐱᓕᕆᑎᓪᓗᓯ.
- ᓄᓇᓕᖕᓂᑦ ᐳᓚᕋᕐᖕᓂᖅ: ᑲᑭᕙᒃᑯᑦ ᓄᓇᓕᖕᓂᑦ ᑕᒪᕐᒥᒃ ᕿᑭᖅᑖᓗᖕᒦᑦᑐᓂᒃ ᐊᑕᐅᓰᕐᖢᑎᒃ ᐊᕌᒍᑕᒫᑦ ᓂᐅᕐᕈᓇᓱᓲᖑᕗᑦ. ᑐᑭᓯᒋᐊᖅᑕᕐᕕᒃ ᖃᕋᓴᐅᔭᒃᑯᑦ ᖃᐅᔨᒋᐊᕐᐸᒡᓗᑎᑦ ᖃᖓ ᓂᐅᕈᓂᐊᕐᒪᖔᑦᑕ ᓄᓇᔅᓯᓐᓄᑦ. ᐊᑲᐅᑦᑎᐊᖅᑐᖅ ᑐᑭᓯᒋᐊᒃᑲᓂᕈᒪᒍᔅᓯ ᐅᕝᕙᓘᓐᓃᑦ ᑲᑎᒪᖃᑎᖃᕐᓗᓯ ᑕᐅᑐᒃᓗᒋᑦ ᑲᑭᕙᒃᑯᑦ ᐃᖅᑲᓇᐃᔭᕐᑎᖏᓐᓄᑦ.
