ᓴᖅᑭᑕᐅᑦᑕᐅᑎᒋᔭᕆᐊᓕᒃ
ᑕᒫᓂ ᐱᓇᓱᐊᕈᓯᕐᒥ ᑲᑭᕙᒃ ᑲᑐᔾᔨᖃᑎᒌᒃᑯᑦ ᓇᔅᓯᐅᔾᔨᖃᑦᑕᓂᐊᖅᑐᑦ ᐅᖓᑖᓃᑦᑐᓂᑦ 600 ᐊᖏᕐᕋᒥ ᐃᓕᓐᓂᐊᕈᑎᔅᓴᓂᑦ ᓱᕈᓯᕐᓄᑦ ᐸᐃᕆᕕᒻᒦᐸᑦᑐᓄᑦ ᕿᑭᖅᑕᓂ ᓄᓇᓕᐅᔪᓂᑦ. ᐊᑐᓂᑦ ᐃᓕᓐᓂᐊᕈᑎᔅᓴᐃᑦ ᐃᒪᐃᑦᑑᓪᓗᑎᒃ ᐃᓕᖅᑯᓯᑦᑎᓐᓅᖓᔪᑦ ᐅᖃᓕᒫᒐᑦ, ᐋᖅᑭᔅᓱᒐᑦ, ᐱᙳᐊᕈᑏᑦ, ᐱᙳᐊᓪᓗ ᖁᕕᐊᒋᔭᐅᓂᐊᖅᑐᑦ ᓱᕈᓯᕐᓄᑦ ᖃᑦᑎᑐᐃᓐᓇᕐᓂᑦ ᐅᑭᐅᓕᓐᓄᑦ. ᑖᒃᑯᐊ ᐃᑲᔫᑕᐅᔪᓐᓇᕐᓯᓯᒪᔪᑦ ᑲᑐᔾᔨᖃᑎᒌᓪᓗᑎᒍ ᐃᖅᑲᓇᐃᔮᕐᓄᑦ ᐃᓅᓯᓕᕆᓂᕐᒨᖓᔪᓄᓪᓗ ᐱᕙᓪᓕᐊᔪᓕᕆᔩᑦ ᑲᓇᑕᒥ.
“ᖁᕕᐊᓱᓪᓚᕆᑦᑐᒍᑦ ᓇᔅᓯᐅᔾᔨᔭᕆᐊᔅᓴᖅ ᑖᒃᑯᓂᖓ ᓇᒻᒪᒑᕐᓂᑦ ᐃᓗᓕᖃᖅᑐᑎᒃ ᐃᓕᓐᓂᐊᕈᑎᔅᓴᓂᑦ ᐊᒻᒪᓗ ᖁᕕᐊᓱᐊᒍᑎᔅᓴᓂᑦ ᓱᕈᓯᕐᓄᑦ ᕿᑭᖅᑕᓂ ᓄᓇᓕᐅᔪᓂᑦ” ᐅᖃᖅᑐᖅ ᔨᐅᓚᒥ ᑑᕐᖔᓗᒃ, ᑲᑎᒪᔩᑦ ᐃᔅᓯᕙᐅᑕᖓᑦ ᑲᑭᕙᒃ ᑲᑐᔾᔨᖃᑎᒌᖏᓐᓂᑦ. “ᕿᑐᕐᖓᕗᑦ ᓯᕗᓂᔅᓴᕆᒐᑦᑎᒍ, ᐊᒻᒪᓗ ᐃᑲᔪᕈᒪᓪᓗᑎᒍ ᐃᓕᒍᒪᓂᕆᕙᑦᑕᖏᑦ ᖃᐅᔨᔭᕆᐅᕈᒪᓂᕆᕙᑦᑕᖏᓪᓗ.”
ᓄᕕᐱᕆ 20 ᓄᓇᕐᔪᐊᓕᒫᒥ ᓱᕈᓯᕐᓄᑦ ᐅᓪᓗᕆᔭᐅᒻᒪᑦ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᒃᑯᑦ ᐅᑉᐱᕈᓱᑦᑐᑦ ᑖᓐᓇ ᐊᑲᐅᓈᑦᑎᐊᕐᓂᖓᓂᒃ ᖁᔭᓐᓇᒦᕐᓗᑎᒍ ᕿᑐᕐᖓᕗᑦ ᐃᓅᓯᑦᑎᓐᓂᒃ ᐱᕙᓪᓕᐅᑎᑎᑦᑎᓯᒪᓪᓚᕆᖃᑦᑕᕐᖓᑕ. ᖁᔭᓐᓇᒦᒃ ᐅᕙᑦᑎᓐᓂᒃ ᖁᖓᑦᑎᑦᑎᕙᒃᑲᔅᓯ!
ᐊᕙᑎᑦ (20) ᐊᕐᕌᒍᑦ ᐅᖓᑖᓂ, ᑲᑭᕙᒃ ᑲᑐᔾᔨᖃᑎᒌᒃᑯᑦ ᑮᓇᐅᔭᓂᑦ ᐃᑲᔫᑎᖃᖃᑦᑕᕐᓯᒪᒻᒪᑕ ᐸᐃᕆᕕᓐᓄᑦ ᕿᑭᖅᑕᓂ ᓄᓇᓕᐅᔪᓂᑦ ᐊᒻᒪᓗ ᐱᒃᑯᒍᓱᑦᑎᐊᖅᑐᑕ ᑕᑯᔪᓐᓇᕋᑦᑕ ᖃᓄᑎᒋᒃ ᐃᑲᔪᖅᑕᐅᖃᑦᑕᕐᓂᖏᑦ ᐊᖏᓪᓕᕙᓪᓕᐊᓯᒪᒻᒪᖔᑕ ᐊᕐᕌᒍᓂᑦ ᐊᓂᒍᖅᑐᓂᑦ ᒫᓐᓇᕋᑖᖑᓯᒪᔪᖅ. 
ᑲᑭᕙᒃ ᑲᑐᔾᔨᖃᑎᒌᒃᑯᑦ ᐋᖅᑭᐸᓪᓕᑎᑦᑎᓯᒪᒻᒥᒻᒪᑕ ᐃᑲᔫᑎᒋᕙᑦᑕᖏᓐᓂᒃ ᐸᐃᕆᕕᓐᓄᑦ ᓄᕙᕐᔪᐊᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ − ᑐᓂᓯᓯᒪᓪᓗᑎᒃ ᓴᓗᒻᒪᕐᓴᐃᑎᓂᑦ ᐱᕈᓇᕐᓴᐃᑎᓂᓪᓗ, ᐊᐃᑦᑐᖅᑕᐅᔾᔭᐃᒃᑯᑎᓂᑦ, ᐊᒻᒪᓗ ᐋᓐᓂᐊᓯᐅᖅᑎᓄᑦ−ᓇᒻᒪᒋᔭᐅᓯᒪᔪᓂᑦ ᐊᓂᖅᑎᕆᓂᕐᒧᑦ ᓴᓗᒪᒋᐊᒃᑲᓐᓂᖁᑎᔅᓴᓂᑦ ᖃᓂᒪᓇᖅᑐᖅᑕᖃᖁᓇᒍ.
ᐱᒃᑯᒍᓱᑉᐳᒍᑦ ᐃᑲᔪᕆᐊᔅᓴᖅ ᓯᕗᓂᔅᓴᑎᓐᓂ ᑭᖑᕐᖑᔾᔨᔨᒋᐊᓂᖅᑕᑎᓐᓂᒃ ᓄᓇᓕᑦᑎᓐᓂ ᐊᖅᑯᑎᒋᓪᓗᒋᑦ ᓱᕈᓯᑯᓗᑉᐳᑦ.
ᑐᓴᕋᔅᓴᓕᐊᑉ ᒥᔅᓵᓅᑦ ᑐᑭᓯᒋᐊᕐᕕᐅᔪᓐᓇᖅᑐᖅ:
ᐄᕙ ᒍᕉᕝᔅ
ᐊᐅᓚᑦᑎᔨ, ᐸᐃᕆᕕᓐᓅᖓᔪᓄᑦ, ᐃᓅᓱᑦᑐᓅᖓᔪᓄᑦ ᐊᒻᒪ ᑎᒥᒃᑯᑦ ᐊᔪᕈᑎᓕᓐᓅᖓᔪᓄᑦ
ᑲᑭᕙᒃ ᑲᑐᔾᔨᖃᑎᒌᖏᓐᓂ